Sisindiron

RALAN SUKUON

Songkuro sodu norikotku
piro laid kino'ibakanku
sundung piyad natalup
ralan ka'andaman nu
mulong piyad natagak no
ngawi pini gaaganakon to
hiti ko id kasarahanku
ingga'a kinatagako
aiso kinolihuo.

Tambalutku,
baino nosukod to no di
nakatalib to no sumingkidou
koilo toh no sumongkodung
posundur do kinoingkokoton
powonsoi ralan koposion.

Sompi tanud tokou no ralan
ih rinontisan tokou kondiri
rikoto tokou sukuon
sumugku pupus puralan
ih niantalang do Minamangun.

ALOYINDRA
Momogunsia

AMU KO NANGKU

Amu ko nangku lumangad
tuni kulintangan
tuni sompoton
tuni bungkau
tuni tongkungon
tunion di aki-aki
tunion koubasanan
koubasanan kasari-sari
it koimayaan taki lombus d gulu
It pongilaan do tulun dot e yati no ih pasok do momogun.

Nokoilo ko nangku,
it okoro po molohing to
amu koodop nung
amu korongou di tangon di odu
Ligot liou
Kara om buu
Urui-urui

Kotutun ko nangku  taki to susumangod do suang waig
aki Minggidan
aki Rumantai
aki Gombunan
aki Tumunda

Nokuro tu batil dilah nu
amu ko di koboros
boros dong koubasanan dati
hinonggo di it pongilaan do tulun,
do iya nopo tulun do pasok momogun-mogun
amu ko nangku orosian
atagak boros
atagak no o tinaru.

GILOY L.RIMPIN
Kota Marudu

GIUK

wulan giuk
amu awasi mitanom
tinanom kigiuk.

ONY BASALIN
Kg.Kuranji,
Kota Marudu
10/8/2016

TINANOM  

   

Tikid tadau mongoi sid botung
Mogium koposion mogium tuntung

Tikid tadau mongoi monginsakot
Otomon tinanom kasanangan rumikot

Tikid tadau mangaraus baja
Sumuni tinanom otomon dara

Tikid tadau mongoi gumama
Mogium koposian ponukup balanja

Monotos kumaraja gisom otuwong
Mogium koposion ponuwang lonjong

Sangadau-ngadau opodsu tumos
Mangaragus botung mimang monotos

Mangaragus botung mimang monotos
Osompug parai amu orikos

Parai tinanom awasi bajaan
Sumuni nopo alanji kokitanan

Parai naansak langkasan mongomot
Amu no orutus om amu osupot

Parai wagu awasi kaakanan
Angod sumayub ogumu kowosian.

HANAFIAH MZ
Tuaran