Rompon nakaanu ngaran mantad sumandak Rumandawi

Rompon mantad kinaantakan monompon sumandak rumandawi

Susui di Mamai Philip, Kg. Rompon, Tambunan (28/12/2016). 
Sinuat di Velter Jailih, IPG Kent, Tuaran.

KAWALAIAN id Kg Rompon id guas konuluhan.

 II nopo di gulu po ontok kopomolintaan do Boritis nga’, haro songulun kusai minongoi pingkayou id iso’ dimbaan. Asaru no iyau minongoi pingkayou do hiri. Insan tadau masaanan dau do magasu, korongou no isio do tuni di topuod.

Angagaralak nopo miagal do tulun somboros-boros. Misusuut po tuni do sarup sumougi om tumalib do ologod kopio. Ongoyo’ no dau susuuto i tuni dii. Momok-somok isio nga muod-puod o tuni garalak om sougi do sarup dii.

Korikot nopo isio id iso’ bawang nga kokito no disio o turu sumandak di ongolundus kopio masaanan do modsu id iso’ botung. Ongoi no yoti losok orosian do okito di tongosumandak dii.

Hiiri idi yau tolikud do watu tagayo do mongilot diolo modsu. Oluson po kaaka diolo o pinakai om tumolong nogi id botung. Tumolong kaaka i songulun sumandak dii om au no alaid mimbulai no kawagu.

ONTOK rumuhuk sumondot id Kg Rompon.

Nga, okon i ko insan-insanan do tumolong tu koimbulai om kapananrasuk po i nokopogulu om susuuton nogi di sumandak suai. Oimayan kopio i kusai dii. Kapananrasuk kaaka i tongosumandak dii om sumimbul minsawat id tawan om atagak no do atanaban do tawan.

Gisom i do oinsanan i tongosuamandak do modsu do iloton dau. Kousino podi i tongosumandak dii om uli no i kusai di minamanau minongoi id rarantaion dau.

Ontok di nosuaban no, ooyo’ no kawagu di kusai intangai i tongowusak togingo’ do modsu. Om miagal i kasari tu’, opongo po i songulun om korowolison nogi di songulun kawagu do rumatu mantad id tawan gisom i do korikot i sumandak koturu.

Om miagal i kosoruan tu’ tadau-tadau do ongoyon ulito di kusai iyolo do modsu. Gisom podi dii, minimbulai nodi o topurimanan dau do muhang di tondu di kumoturu.

Kolunduso’ di tondu koturu dii nakagayat do ginawo dau tu iri no kaaka bunga’ di olundus kopio do kotoning di suai. Mantad po di diri, minomusorou isio do nakal moi do asawo dau i sumandak dii.

TONGKIADON sumuang id Kg Rompon otoliban dumontol do Apin-Apin, Keningau.

Tadau di kotilombus, miagal i kasari do luminosok isio mada’ do okito di kosumandakan ngawi. Soira tuminuun i sumandak kumoturu mantad id tawan om tindaapou no i sumandak dii do minongolus dii pinakai dioti om tolong no id botung.

Masaanan di tondu pointolong do modsu, ongoyo no losoko’ di kusai i pinakai di tondu dii. Indea…!, soira podi kaaka minindisan i sumandak dii id disan di botung nga nokotigog kopio iyau do nousino no i pinakai dau. Natagak.

Umbal podi i tondu dii mintuarung id posorili dau do mogihum di pinakai dau do koborooso’ nga au i yau kokito. Om hiri i ma i kusai di id tolikud di watu tagayo do poimuri om magandad do timpu di kosudong do moi ruba di sumandak dii.

Kababasai podi i tondu dii do mintuarung, kohuyan om irikau no iyau do toruai  do mumang mingkoyod. Au no alaid om ingkakat no om umbal daa simbul miningkawas do guminuli.

Noiduanan nodi di tongotaka’ dau kopogulu guminuli. Au no alaid om karatu no wagu i kingkiniton dii id tana’. Simbul po kawagu nga minsoririiba’ o kosimbulon dau.

Alaid no podi nga’ au nodi yau kosimbul. Indea!... Pongihad nogi i sumandak dii. Ontok dii, imbulai no i kusai dii do minoi pomuoi di sumandak dii. Kokito podi di kingkiniton i kusai di nga’ koikumai no iyau om sompono’ no dioti i kuo dau minomoguno do ngoduo palad dau.

“Nokuro ko umandak?” tuhot di kusai dii.

“Natagak i pinakai ku. Intai di nga’ poinlagas oku podi,” ka do simbar di kingkiniton dii.

“Kada kotongob oi umandak. Uhupan ku iya’ mogihum di pinakai nu dii,” ka wagu di kusai dii do momolingo.

KOUMAAN id Kg Rompon, Tambunan.

Takal nopo di kusai dii nga, nung uhupan nopo dau i tondu di do mogihum di pinakai disido nga i tondu sowoon dau. Dadi, aiso nogi osorou suai di tondu dii om tuminoboi nodi.

Ongoyo’ no di kusai di o pinakai di tondu dii om pikoruhang nodi yolo.

Ontok podi dii, koinsasad no o tangaanak diolo om pinomuroitan nopo dii di kusai o bawang dii nga bawang Rompon. Ngaran ‘rompon’ naanu mantad kinantakan di sumandak dii do minonompon di kuo dau.

Ii tangaanak nga minonit di kusai, i tapa’ om i taki diolo. Ii nopo tangaanak dau suai nga mininsud id kampung om pogun suai minoi pimpangakan-ngakan do hilo.

Haro i nokoongoi id watas Keningau miagal ko id Apin-Apin, Kampung Bayangan om Kampung Bingkor.

Id watas Ranau miagal ko id Kampung Paus om Kampung Nobutan. Haro nogi tuminomporon id watas Tambunan miagal ko id Kampung Rompon om Kampung Monsok.

Gisom do baino, kokompungan id kinoyonon dii rinoitan do Kampung Rompon. 

KOKITANAN do Kg Rompon mantad gana konuluhan.